ఆ శిల్పం అపురూపం
ఆ మట్టిలో వెన్నెల కలసింది
శిల్పి మౌనంగానే శిల్పించాడు
కాని అందరూ తదేకంగా దానివైపే చూస్తున్నారు
ఆరూపం నిశ్శబ్దంగా ఉంది
లోకం చేత మాట్లాడిస్తుంది.
ఆ శిల్పం కళ్ళల్లో ఏదో వెలుగు
సూర్యచంద్రుల్ని మరిపిస్తుంది
అవును! శిల్పాలు చరిత్రకు గుర్తులు
వీరంతా అబద్ధాలే మాట్లాడుతున్నారెందుకు
ఎన్నో వాయిద్యాలతో
వినిపిస్తున్న ఆ సంగీతంలో
శ్రుతి తప్పింది.
ఆ కొలను ఒడ్డునే ఒకే ఒక
చెట్టు మీద కోయిల పాట
ప్రపంచగీతం అయ్యింది.
అవును! వార్డ్స్‌వర్త్‌ చిన్న పువ్వులో
అంత సౌందర్యాన్ని ఎలా చూశాడు
లండన్‌లో హౌసాఫ్‌కామన్స్‌ ఆయనకు నచ్చలేదా!
ఆ ప్రక్కనే వున్న పెద్దచర్చి
బంగారు తాపడంతో ధగధగ లాడుతోంది.
అక్కడ వందలమంది
తెల్లని వస్త్రాలు ధరించి
కేరల్‌ సాంగ్స్‌ పాడుతున్నారు
కాని, ఆయన ఆవూరి
పచ్చని తోటలోని
తుమ్మెదల గుంపు గురించే
అక్షర స్వరాలు వినిపించాడు.
నిజమే! ఆ ఎత్తుగా వున్న గణపతి కంటే
ఆ టాంక్‌ బండ్‌ మీద చూపుడువేలుతో
నిలబడ్డ నీలంకోటు శిల్పం
రాజ్యాంగాన్ని మనకు బోధిస్తుంది.
కొన్ని భావోద్రేకాలు
కొన్ని తరాల జీవన సౌందర్యాలు
ఏమిటి! అంత ఎత్తుగా చేసిన
ఆ విగ్రహానికి రాజ్యాధిపతులు
మోకరిల్లుతున్నారు.
నిజమే! మనిషి ఎంత ఎత్తు ఎదిగినా చూడడం లేదు
వినుకొండ అంచుల్లో కూర్చోని
సాలీడు కథ చెప్పిన
మహాకవి ఆయన కథ చెప్తునే వున్నాడు.
అవును! కలకత్తా కాళిక నాలుకకు
ఎన్నో నెత్తుటిగాథలు వున్నాయి
ఆ కాఫీ క్లబ్‌లో కూర్చున్న ఆ ఇరువురు
పెళ్ళి గురించి ఎన్నో విషయాలు మాట్లాడుకొన్నారు.
కాఫీ చల్లారిపోయింది
మళ్ళీ మాటలకు ఒక గజం నేల లేదు
బొమ్మల పెళ్ళిళ్ళు, ఊరేగింపులు
అవ్వాయి సువ్వాయలు
మానవ సంబంధాల్లోని నైర్మల్యానికి కూడా
బూతు నిర్వచనాలు
ఆ హిమాలయాల్లో కూడా మీరు
రాతి బొమ్మల కోసమే ప్రయాణిస్తున్నారు
ఆ ప్రకృతి అందాలు
మీ శబ్దాల హోరులో
నిశ్శబ్దం సౌందర్యాన్ని కోల్పోతున్నాయి
విగ్రహాలు వేరు, శిల్పాలు వేరు
ఊటిలో మేఘాలు
మన చేతుల కందుతున్నాయి
ఆ పొడవాటి పొన్నాయిచెట్లు
పూలవర్షం కురుస్తుంది
ఉన్నితో నేసిన శాలువలు
ధరించిన కాంతలు
గుంపు నృత్యం చేస్తున్నారు
అడుగు అడుగుకు
చెట్లు వంగి నమస్కరిస్తున్నాయి.
వారి చిరునవ్వుల్లో
ప్రకృతి వికాశం వుంది.
తేనెల్లో ముంచిన రొట్టె ముక్కలు
వారిలోని సౌందర్యాన్ని
ఇనుమడింప జేస్తున్నాయి
ఆ ముఖాల్లో విరబూస్తున్న నవ్వులకు
ఆ పూలు వికాసం ఓడిపోతుంది
ఆ రాచ దేవేరిముఖంలో కళలేదు
ఆమె తన్ను తాను
ప్రకాశవంతం చేసుకోవడానికి
ఎన్నో నగలు ధరించింది
ఆ గిరిజన స్త్రీల ముక్కుపుడకల ముందు
అవి వెలవెలబోతున్నాయి
మూలవాసులదే సహజ సౌందర్యం
సముజ్వలత, సముత్తేజం
సజీవ శిల్పాలు వారే
వారే చరిత్రకు గుర్తులు
ఆ శిల్పాలు వన్నెలు తరగనివి సుమా
ప్రగతి కాంతులు అందులో నిక్షిప్తాలు
కృత్రిమమైనవన్ని కూలుతాయి
సహజమైనవన్ని నిలిచి వెలుగుతాయి.
