ఆచంట హైమావతి
కతలలో – కైతలలో
పాటల్లో – పద్యాల్లో
స్త్రీ జనాభ్యుదయం-
వెల్లివిరుస్తోంది… గాని
చేతల్లో – చేతనల్లో
మృగ్యమౌతున్నది –
వెనుకంజ వేస్తున్నది.
విద్యార్హతలు – విజ్ఞానాలూ
గడించి – గడించి …
స్వయం సంపాదనాపరులం కావాలనీ
శతధా …. సహస్రధా యత్నించి
సఫలులైనామని సగర్వంగా…
ధైర్యంగా అభివ్యక్తించి-
సంతోషానుభూతి నొందుతుంటే…??
ఆశించిన ఫలితం ఏదీ…?
వట్టి శూన్యం! క్రూరం – ఘోరం …
బలాత్కారాలు – బలవన్మరణాలు,
యాసిడ్‌ దాడులు – లైంగిక వేధింపులు,
జి ఘాంస క్రియలు – కృతక ప్రేమలు
విపరీతాలై … మితిమీరుతున్న –
ఈ వ్యధాకులిత తరుణంలో-
ఓ మహిళా! లే…! పిడికిలి బిగించు-
ధైర్యంగా ముందుకి సాగు
అంతశ్శక్తిని ఉద్దీపన చేసుకో!
దుస్సహ దుర్మార్గ శక్తుల నెదిరించి-
మట్టుపెట్టి – మారణహోమం గావించు!
విశేషాభ్యుదయ పథంలో పయనించు
నీసాటి నీవేనని నిరూపించు
క్రొంగొత్త తరానికి నాంది నినదించి-
పురోగామివై సదా భాసిల్లుమమ్మా!
