మట్టిలో మాణిక్యాలు… – భమిడిపాటి ఫణికుమారు

ఎదగడానికి ఎందుకురా తొందరా
ఎదర బ్రతుకంతా చిందర వందరా అన్నాడో కవి
నిన్ను చూసేనేమో
నీలాంటి ఎందరో చిట్టి తల్లులకి జీవితమంతా వెతలేనని
బ్రతుకు బండి పసితనంనుంచే లాగమని
చదువుల తల్లి మీకు అందని ద్రాక్షేనని !
పొట్టకూటికోసం ఎక్కడినుంచో వస్తారు
ఊరిచివరో, ఏ బస్తీలలోనో గుడారాల మాటున
జనం మధ్యలోనే జనాభా లెక్కలకి దూరంగా
బ్రతుకు పోరాటం చేస్తూ !
అమ్మ నాన్న సంపాయించేది రోజు గడవడం కోసమే
అందులో నాన్న తాగుబోతు అయితే ఆ తిండి గింజలు కూడా కష్టమే
ఇంకెవరు నీ గోడు వింటారు
నీ పసి ప్రాయానికి అక్షరం ఆలంబన అవుతుందని
ఈ మట్టిలో మాణిక్యాలకి చదువుకునే హక్కు వుందని
ఎవరు గుర్తిస్తారు !
ప్రజల కోసం పనిచేసే ప్రభుత్వాలకు
కోట్లల్లో విరాళాలు ఇచ్చే కార్పోరేట్‌ సంస్థలకు
నల్ల ధనాన్ని గుప్తంగా దాచే ఆశ్రమాలకు
మీ కోసమే మేమున్నామనే సేవా సంస్థలకు
ఏ హోటళ్ళలోనో, చిత్తు కాగితాలు ఏరుకుంటూనో
నలిగిపోయే వీరి బ్రతుకులు కనపడవా
ఎప్పుడు పుట్టారో కూడా తెలియని వీరికి
చదువు చెప్పాలంటే ఆధార్‌ కార్డులు కావాలా !
నేటి చిన్నారులే రేపటి భావి భారత పౌరులు
ఓ సంఘ విద్రోహి, ఓ మేధావి తయారయ్యేది ఈ వయస్సులోనే
చేసే అక్షర దానమే వారి బ్రతుకుల్లో వెలుగని తెలియదా !
మీ చట్టాలు ఎలాగూ కొందరికి చుట్టాలు
కనీసం విద్యకోసం చేసే చట్టాలైనా కఠినంగా ఉంచండి
ప్రతి చిన్నారిని చదివించండి
అన్ని దానాలలోకెల్లా విద్యాదానం మహాదానమని
తర తరాలకు తెలియ చెప్పండి !…..