సహనం సంయమనం కలగలిసిన కదంబానివి
సంస్కృతీ సభ్యతల నిజబింబానివి
మాయని విలువల సంకేతానివి
మానవతకి నిక్కమైన ఊతానివి
ఏ దేశపు గౌరవానికైనా గీటురాయివి నీవు!
ప్రేమకు ప్రియనేస్తానివి
మమకారపు మరో రూపానివి
అన్ని బంధుత్వాలకు కేంద్ర బంధువువి
మనిషికీ మనిషికీ మధ్య మనోహర వారధిని నీవు!
మాడే కడుపుతో పరమాన్నం తినిపిస్తావు
మండే గుండెలతో మధురసాలందిస్తావు
అరిగిపోతూ మాకొక ఆకృతినిస్తావు
అలసటెరుగక మా భవితకు పునాదులేర్పరుస్తావు
లోకమనే నందనవనాన వెలసిన ఆనంద గంధానివి నీవు!
ఆత్మీయ సేవలతో అలరించే అపురూపమైన తల్లివి!
ఆప్యాయతా రాఖీతో బంధించే బంగారు చెల్లివి!
అనుక్షణం జీవితాన్ని రసభరితం జేసే ప్రియ సఖివి!
ఆసరాగా నిలిచి వాత్సల్యం పంచే ముద్దుల పాపవి!
ఎన్నెన్నో రూపాలతో నా చుట్టూ అల్లుకున్న ఆద్యంతానివి నీవు!
ఓ స్త్రీ మూర్తీ!
నిన్నావిష్కరించడంలో యధార్ధానికి నేనశక్తుణ్ణి!
నీవైనా చేయగలవా యథాతథంగా నీ పరిచయాన్ని?
