ఎంతటి గొప్ప అడుగులు మీవి
సముద్రంతో ఆటలాడుకున్నవి
భీకర అలలతో భయపెట్టిన
సముద్రపు గుండెమీద తన్ని
బడుగుల కాపాడినవి
కంటకావృత మార్గాల పయనించి
అరికాళ్ళు చీరుకుపోతున్నా
గమ్యం సడలలేదు
ఎంత గొప్ప కళ్ళు మీవి
కాలుమోపడానికి
కాసింత జాగ కోసం
కాలమంతా వెతికినవి
ఎన్ని భయవిహ్వల దృశ్యాలు జూశాయో
ఎంతగా దుఃఖ నదులై పారాయోగాని
అచంచల విశ్వాసాల్ని
కంటికాంతులుగ నిల్పినవి
పున్నమి వెన్నెల కాంతుల విరజిమ్మినవి
ఎంత గొప్ప హృదయం మీది
తుఫానులెన్ని రేగినా
ప్రళయాగ్నులు చెలరేగినా
సముద్రాల్‌ ఉప్పొంగినా
మానవుడజేయుడని
మహోన్నతంగా చాటిచెప్పినవి
చెల్లెళ్ళారా! నా తల్లుల్లారా!
అరబ్‌ రక్తకాసారంలోంచి
పైకి లేచిన అగ్నిపుష్పాల్లారా!
ఇల్లులేదా మీకు
చెదరని ఆత్మవిశ్వాసమే
భద్రమైన మీ పొదరిల్లు
జాతీయ గీతమే లేదా,
ఉత్పాతాలకెదురేగి
మీరెత్తిన పోరుగీతమే
అసలైన జాతీయ గీతం
ఒక్క బంగారు పతకమూ రాలేదా..
విధ్వంసంలో
చెదరని దీపాల్లా
మీ చెదరని చిరునవ్వులే
జాతికి మీరిచ్చే బంగారు పతకాలు
మీరు ఓడిపోతేనేమి,
చెదరని ఆత్మవిశ్వాసంతో
ప్రపంచాన్నే గెలిచారులః
అందుకే…
మీకు సలాం
మీ మాటకు సలాం
మీ బాటకు సలాం
…………………
సిరియా శరణార్థి యూస్రా ఒలింపిక్స్‌లో పాల్గొన్న సందర్భంగా
