చిట్టి పొట్టి నా మాటలతో మిమ్ము అలరించాలనుకున్నాను
పై చదువులెన్నో చదివి మీ పేరు నిలపాలనుకున్నాను
అదృష్టమని భావించాను ఎపుడెప్పుడని నే ఎదురుచూసాను
అంతలోనే ఈ అఘాయిత్యమా ఏంటమ్మా నే చేసిన తప్పు
ఆయువు పోయమని నేనడిగానా బ్రహ్మదేవుడిని బ్రతిమాలానా?
కడుపులోనే కడతేర్చారు భూమి పైకినే రానన్నానా?
అమ్మాయిగా జన్మెత్తడమా? లేక అసమానతలతో కూడిన సమాజమా?
అమ్మా అన్న నా పిలుపులో అంత మాధుర్యముండదా?
అన్నో తముడో అయితే ఆ పిలుపే అమృత భాండమా?
నాకు తెలుసమ్మా నీ మనోవ్యధ, ఎన్ని కన్నీళు కార్చావో నన్ను బ్రతికించుకోడానికి
పడకూడదు ఏ తల్లీ నీ శోకాన్ని అందుకే నా ఈ సందేశం
నాలాంటి గాయపడిన పసి హృదయాలు వ్రాయలేని కావ్యాలెన్నో!
