వికృతం – డా|| పెళ్లకూరు జయప్రద సోమిరెడ

ఒకానొక కామ వికృతానికి

బలైన బాల్యం

తల్లిదండ్రుల సంఘభీతికి

పెళ్ళి పల్లకీ ఎక్కిన యవ్వనం

పెదాలమీద నక్షత్రాలు పూయిస్తూ

రోబోలాంటి భర్తతో కాపురం

ఎంత నైచ్యమైన బ్రతుకు నాది!

భయంకరమైన రహస్యాన్ని

కడుపులో దాచుకోలేక

దు:ఖాల అగ్ని

నన్ను కొలిమిలో కాల్చేస్తుంటే

పారిజాతాల్ని చూసి నన్ను నేను అసహ్యించుకుంటూ

ఈ వేదనల రహస్యపు బ్రతుకు తనకు అవసరమా?

ఈ దు:ఖపు పువ్వును అంతం చేస్తే…!

ఊహు..!

నేనెందుకు చావాలి? … పాపం ఎవరిది?

రేప్‌ చేసి తప్పు చేసిన వానిది కానీ నాది కాదు కదా!

ఎవరైనా ఏడవాల్సి వస్తే

అది నేను కాదు

నాలోని గిల్టీనెస్‌! అందుకే

దాన్ని

కిరసనాయిల్‌ పోసి కాల్చేసాను

ఆ అగ్నిలో నుండి

స్వచ్ఛమైన చిరునవ్వులా

మలినం అంటని జాజిమొగ్గలా

తిరిగి జన్మించాను