నీకు నువ్వే ధైర్యం
నీకు నువ్వే సైన్యం
ఎవరైనా ఎప్పుడూ వెనకవుండి నడిపించరు
తల్లైనా, తండ్రైనా ఎవరైనా…
నీకు నువ్వే స్థైర్యం
నీకు నువ్వే చైతన్యం
ఎవరైనా ఎప్పుడూ మన ముందు వుండి దారి చూపరు
అన్నైనా, అక్కైనా ఎవరైనా….
నీకు నువ్వే బలం
నీకు నువ్వే బలగం
ఎవరైనా ఎప్పుడూ మన పక్కనుండి అడుగు వేయించరు
హితులైనా, స్నేహితులైనా ఎవరైనా….
నీకు నువ్వే స్నేహం
నీకు నువ్వే ‘మనం’.
మనసు దుఃఖభరితమైనప్పుడు
గుండె పగిలి పొగిలినపుడు
హృదయం విచలితమైనపుడు
హత్తుకొని సేదతీర్చాల్సిన హస్తాలు కరువైన చోట
నీకు నువ్వే ఓదార్పు
నీకు నువ్వే సాంత్వన
దుఃఖ చెలమను మధించి
గుండెను దృఢంగ మలచి
హృదయ వేదన మరల్చి
బ్రతుకు పోరున నిల్చిన
నీకు నువ్వే ధైర్యం
నీకు నువ్వే సైన్యం
