నా కూతురు నడక నేర్చుకుంది! – – ఉర్దూ నుంచి అనువాదం: నిఖిలేశ్వర్

పాకిస్తాన్‌ స్త్రీవాద కవయిత్రి

ఫాతిమాహసన్‌

(నా కళ్ళల్లో, కురుల్లో, చెక్కిళ్లపై చూడకండి

నా ధ్యానంలోకి, నా భావాల్లోకి నన్ను చూడండి.)

నా కూతురు నడక నేర్చుకుంది

మైలు రాయి అంకెల గుర్తులకావల

రహదారుల చిరునామాలకావల-

చదవడం నేర్చుకుంది.

ఆరిపోతూ వెలిగే రంగుల కాంతిలో

ప్రయాణపు సరిహద్దులు దాటి

బండి చక్రాల్లో చిక్కుకున్న దారుల్లో

ముందుకెళ్ళడం నేర్చుకుంది.

నా కూతురు

ప్రపంచపటంలో-

తనకిష్టమున్న రంగులు-

నింపడం నేర్చుకుంది,

నా కూతురు

నా వేలు విడిచి నడవడం నేర్చుకుంది!