భూమిక
భూమిక అరుణోదయ పూర్ణ కలశం!
అభ్యుదయ పథాన మమ్ము నడిపిస్తూ చైతన్యపరుస్తూ,
మూఢాచారాల్ని నమ్మకాల్ని ఖండిస్తూ వెళుతోంది.
భూమిక సప్తవర్ణ హరివిల్లు శోభ!
కుల మత వర్గ జాతి వివక్ష లేని,
సకల స్త్రీల సమ్మిళిత సమాహార సంఘటితం!
భూమిక ఒక జీవనది!
ఎల్లవేళలా ఎల్లకాలం,
నిస్సహాయులకు సహకారం, చేయూతనందిస్తూ పయనిస్తుంది.
భూమిక చల్లని జాబిల్లి!
వెన్నెల చెలులు ప్రసరించేది,
అందించేది సమాజహిత జ్ఞాన కిరణాల్ని!
భూమిక ఉప్పొంగే సాగరం!
స్త్రీల నిర్వేదనల్ని భయకంపితాల్ని అయోమయాల్ని
తనలో బడబాగ్నిలా దాచుకొని,
చెలియలికట్టను దాటక అందరికీ అభయాన్నిస్తూ రక్షిస్తోంది.
భూమిక విరిసిన ఎర్ర మందారాల పొద!
వివక్షను లైంగిక వేధింపులను ఖండిస్తుంది.
అత్యాచార బాధితులకు అండ!
విజృంభించి వెంటాడి వేటాడుతుంది నేరస్థులను!
భూమిక మధుర గానాల వేణువు పిలుపు!
ఆర్తులకు స్ఫూర్తినిచ్చి సేవలందించే చెలుల,
నందనందన ఆనంద బృందావనం.
షషష ` రమాదేవి చేలూరు
