ఎంత బాగుందో
ఉంగరాల జుట్టుకి
అమ్మ వేసిన రిబ్బను ముడి
పట్టుకుచ్చులా మెరిసిపోతూ
ముద్ద మందారమని అమ్మ
ఎర్రగులాబీ అని నేను
అనుబంధాల పండుగకి
అన్న చేతికి కట్టిన రక్ష
నిండు పున్నమిలాంటి రాఖీ
అన్న ఇచ్చిన బహుమతితో
వెన్నెలకాంతులతో పోటీపడిన మోము
అప్యాయతపోగులముడి
దిష్టి తగులకుండా
అమ్మ ప్రేమతో
కాలికి కట్టిన నల్లదారం
అందెలకు ధీటుగా ఆభరణమైంది
దీనితో చెడుచూపు సోకదట
ధైర్యాన్నిచ్చిన ముడి
ముత్యాల పందిరిలో
సిగ్గుల మొగ్గకు మూడుముళ్లు
ఒకటిగా బతుకు సాగించడానికి
పెద్దలు ఆశీర్వదించిన ముడి
కొంగులను కలిపి వేసిన ముడి
కోటి ఆనందాల ముడి
త్వరలోనే ముడి రహస్యం తెలిసింది
అది బానిసగా మార్చేముడని
శరీరాన్ని నిలువు దోపిడీ చేసేదని
మనసును ముక్కలు చేసేదని
బంధనాల ముడని
సంకెళ్లకు మారుపేరని
