ఆడపిల్లల్ని నవ్వ నివ్వండి
పారిజాత సుమాల్ని రాలనివ్వండి
ఏ హాస్యోక్తికి పులకరింపో అది
ఏ మధుర జ్ఞాపకాల చిలకరింపో ..
ఏదైనా కావచ్చు
వాళ్ళు కడుపు నిండా నవ్వుతున్నారు
కళ్ళ నిండా తడిసి
బుగ్గల నిండా కురిసి
విచ్చిన పెదవుల్తో
నవ్వుల నదులవుతున్నారు
ఆ నవ్వులు సరిహద్దులు లేవు
సంకోచాలు అసలే లేవు
ఆంక్షలు
అనకట్టలేం ఆగుతాయి?
ఆ పసికొమ్మల్ని డిస్టర్బ్‌ చెయ్యకండి
వెలుతుర్ల పక్కన నీడలు పరచకండి
శతాబ్దాలుగా నిషేధించబడిన నవ్వు
ఇప్పుడు రేకులు విప్పిన పువ్వు
పురుషాధిపత్యం
అది నిన్నటి సత్యం
నాలుగు విధాలా చేటన్నది
కలం చెల్లిన కట్టడి
వాదాలూ … వివాదాలూ వద్దు
నవ్వుల వెన్నెలలై వెలగనివ్వండి
ఈ అమృతధారల్లో తడిసిపోతే
మిత్రులారా!
మీరూ
ఓ కొండంత నవ్వై ప్రతిధ్వనిస్తారు
