మరి కాస్త స్వేచ్ఛ మాకుంటే
పుట్టక ముందే గిట్టిపొయేలా చేసే మానుష-కర్కశత్వాన్ని కాదని
జీవించే అవకాశం మాకు దక్కేది – మా బలగం మరికొంత పెరిగేది!
మరి కాస్త స్వేచ్ఛ మాకుంటే
నాలుగక్షరాలు నేర్చి ఈ ప్రపంచాన వెలుగులు నింపి
ప్రగతి పథాన పరుగెత్తించే వాళ్లం !
మరి కాస్త స్వేచ్ఛ మాకుంటే
ఈ ‘కట్టు’ బానిసత్వాన్ని కాదని
స్వయం సమృద్ధులమై, మా జీవికను గౌరవంగా ఆర్జించుకునే వాళ్లం !
మరి కాస్త స్వేచ్ఛ మాకుంటే
దురాశాపరులను / చరిత్ర హీనులను వలదని
సజీవ దహనాలకు బలికాక సురక్ష జీవనం సాగించే వాళ్లం !
మరి కాస్త స్వేచ్ఛ మాకుంటే
పకడ్బందీ కుటుంబ నియంత్రణ పథకాలతో ఈ భువిని
‘జన విస్ఫోటం’ నుండి కాపాడి సుసంపన్నం చేసే వాళ్లం !
మరి కాస్త సహకారం మాకందుంటే
సమాజంలో మానవత్వాన్ని పెంచి
నిస్సహాయ, నిరాశ్రయ స్త్రీ మూర్తుల బలవన్మరణాల నంతమొందిచ్చే వాళ్లం !
మరి కాస్త తర్కం మీకుండి, మాకు చేయూత నిచ్చుంటే
అమానుషపు కట్టుబాట్లు, మూఢాచారాలు
అంధ విశ్వాసాల వధ్యశిలల నుండి అతివలెందర్నో తప్పించే వాళ్లం!
కానీ, ఆశించినంతనే ఏ వెలకూ అందని ‘స్వేచ్ఛ’ను
ఎవరైనా ఎందుకిస్తారు నేస్తం ?
కాలాతీతం కానీకు – ‘శ క్తి’ సమీకృతగా ఎదిగి-సాగిపో
నీ జీవన యానం జయకేతనాలతో ప్రభవిస్తుంది !!
