పొద్దు వాలాక – మెర్సీ మార్గరెట్‌

చుట్టూ చూస్తాం

ఏదో ఓ చెట్టు నీడనివ్వదా అని

నీడ నీడే

సూర్యుడున్నంత వరకు

నీడ నీడే

వెలుతురున్నంత వరకు

నీడ చెట్టు చుట్టూ చేరి

ఆడుకుంటుంది

చెట్టులోనే నీడ

నీడతోనే చెట్టూ అన్నట్టూ

సూర్యుడెళ్ళిపోతాడు

నీడ వెళ్ళిపోతుంది

చెట్టు ఇంకొన్ని ఆకుల్ని రాల్చుకొని

పక్షుల స్వరాల్ని ఒంటికి అలంకరించుకుని

కలంకారి చిత్రకళలో

ఋషిలా కూర్చుంటుంది

చెట్టుకు నువ్వు

నీకు చెట్టు

ఎప్పటికీ అతిథులే