ఆ అమ్మ కడుపులో ఊపిరికోసం
పోరాడిన కాలం ఎంతో!
ఆ పసికన్నుల పసిడి కలల్లో
వసివాడని వెలుగులు ఎన్నో!
ఆ బంగరుతల్లి మనసులో
సుడులు తిరిగిన కన్నీరెంతో!
ఆ ఆడపుటక అడుగడుగుల్లో
గుచ్చుకున్న మగ ముళ్ళెన్నో!
ఆ వివక్షతా వైకల్యాలకు
ఎదురొడ్డిన ధైర్యం ఎంతో!
ఆ చదువుల సంపాదనకై
పరిగెత్తిన ధీరత ఎంతో!
ఆ ప్రేమోన్మాద పిశాచాలను
ఎదిరించిన ధీరత ఎంతో!
ఆ పెళ్ళి తంతుల సంతలకోసం
బేరసార విలువలు ఎంతో!
ఆ గడపను దాటించిన
మగవాడి హింసది ఎంతో!
ఆ కోడరికం తలుపుల మాటున
కాల్చేసిన క్రూరత ఎంతో!
ఆ జన్మంతా ఋణపడటానికి
కాపాడిన ఆప్యాయత ఎంతో!
ఆ అమ్మాయీ మనిషేనని
గుర్తించే కాలం ఎపుడో!
